النصيحة

أوصيك كود إنك تعلم بتوصاة أفهم كلامى واحتفظ به حزابه

المقعد اللى ماهروجه معاناة فضك منه من يوم كل هذى به

من يوم ماهروج السوالف من قضاة ولا تويسى راى بين القرابه

هذول حشوة الراس وإملاة ومن عقبهن ماللخراريف بابه

والصاحب اللى ماأنت عارف نواياه أوصيك أنا عن صحبته واقترابه

اللى إن عطيته سر لإعداك وداه أفيد من إملاقاه غير إجتنابه

وسية كبيرة ياولد صحبتك إياه صاحب ولما تلوح يغز نابه

وصاحب عزيز إن عاز منك مقضاه وإن عزته إنت تقول ركبت ركابه

لا توصله ولاتشقر حويلاه والرزق عند اللى وسيعة أبوابه

والصاحب الأصلى خزاين من الله وإن خرفك تلقاه قوية أعصابه

دونك يطيح إطياح دوبك تلقاه لو كان فقرى مايحس الدبابه

والصاحب اللى وإنت مزنوق تلقاه وأما الرخا هذا كثيرة أصحابه

وافى الخصايل

ياراكب اللى فى ضلوعه لواهـيد من كثرماجروا عليه البطنـــــه

وافى الخصايل من جميع المناقيد إطــلاق شملة عد مافيه ظنـــــه

عند إختياره ماقنـــوه الولاليـــــد مصيون مالعبوا عليه العفنـــــه

وراعيه ماهمه بعيد المــــــواريد ولا عجز من قول هاته ودنـــــه

وإن أبعدن هن يخسن وهو يزيـد ماهن حــــذاه كود يقــــرع لهنه

والا عبر مايقرعنه مسانيـــــــــد ول نوى ع العيب يكرب مصنـه

العود راسه زى حصاة المراجيد وان حشت راسه غير منك ومنه

والا وصفته زى ذيب القراديــــد وسبيب راسه هاش يسمر عنـــه

ماأحسن تجيبه نهار المواعيـــــد يوم المزاح يصير بين الخشنـــه

والا فات ماظلت لراسك عداعيد رياح قامـــت يوم سبق زبنــــــه

ياديرتى

باديرتى ومرباى وقت الطفولة ماأنسى غلاكى وجيتك اليوم زوار

جيت أتفرج ع الجبل والسهولة وأشرف على المرقاب وأنظر بمنظار

فيك عدو الله رابط خيوله والله مايرضى بك عند كفار

وصرنا نتذارى ومشينا بالليولة ونخاف عقب ماأنت لنا دار

سينا ماغدا ردها بالسهولة إن ماغزاها يوم قد ألف طيار

إن ماغزاها سرب من كل دولة وجيوش فوق مجنزرة تقذف النار

لما دخنها يصير مثل الثعولة يانموت يابنعبش فى عز وأحرار

والخوف ماطول أعمار النذولة دون الوطن كلنا جنود وثوار

والحرب ماهو قول كل يقوله الحرب فعل وراى مدروس بأفكار

والنصر يجلى القلب هذا بلوله يوم إنك فايق وعدوك بينهار

لما يتمنى من الدول يفزعوا له ويقبل شروط الصلح من قبل يندار

مكة

صلوا على بدر النبى يامعازيب المسعد اللى زار مكة وجـــاها

اللى عليها الناس صـاروا جناديب مكة عظيمة يغسل الذنب ماها

أشرفت عالمرقاب روس المراقيب قمت أتفكر دشتــى وش وراها

ولن وراها دود مثل الثعــــــــاليب ناسيه من زين الليالى وحلاها

وأحس قلبى يصهدنه لهــــــــاليب والنار تاكل من يجى على سناها

إحنا ورانا حســــاب ماهو تعاتيب خمس الفرايض لابد عن قضاها

وإن كان ياقلبى تنسى المكــــاتيب النفس هذى تودرك فى طغاهـــا

واللى يطغى بيتعذب تعــــــــــاذيب يوم النفوس بتنسئل عن خطاها

واللى عمل سيات واللى عمل طيب مضمون عند الله يلقى جزاهــا

العمر فانى

كل ماتشوفه العين والعمر فانى واحسب حساب الموت لاصبحت وامسيت
إرع الأجل لاتامنه فى ثوانى لابد فى لحظه يقولوا توفيت

لا تغر بك دنيا الطمع والأغانى ع طيبها ومن جريها ماتوذيت

عمرك يروح وهى نخلها دوانى لا قطعته ولا إنت عنه تغنيت

ول أقفيت منها صار لك عمر ثانى فى بطن حفرة تنسئل إيش سويت

واللى سقط ياحسرته فى الهوان حسرة ع اللى يطيح فى إيد العفاريت

ياخذ عذابه من جميع الألوان والله فاصل فيه بيحيى ويميت

وإن ماهدانى الله ماحد هدانى وأعوذ بالله من أعمال الطواغيت

وخوفى من اللى عند ربى شكانى وأنا من حدودى لحده تعديت

صلوا على المختار هذا الثمانى أفيد من الدنيا صلاتك إن صليت