برقا بدا مزنه وخلته علي وين وقامن عيوني يسهرن عقب شوفه
شوفته تقزلأ علي بلاد الترابين واقول انا العجمه تتنوش اطروفه
شرط الفتي ان قال وحده وتنتين ويحسب احساب ان قصرن به ظروفه
وشديت علي من اركاب الترابين حرا ولد حر وامه صلوفه
وارضم عليه الخرج ودويرعالزين و سوقه علي ما يغبوا ضيوفه
وتقول له يا صاحبي صرت ها الحين اللي تحت رجلينا ما نشوفه
والعمر له حالات يصلب ويزين ويلين يوم تكون نفسك عفوفه
ظليت اداريه لعند الستين كل ما يغبر لونه احوفه
احوفه عن الخونه وعن قلة الدين وعن رزق واحد حوشه من اكتوفه
والناس صاروا يكسبوا بالملايين ومعرضين اصدوغهم لكسوفه
واللي رزق له من ربنا بقرشين دوبه يسوي للملابس بروفه
والناس ما قالوا رزقان من وين ولا قطعن غبر المشاوير جوفه
يروح لاهله بكوم ويجي بكومين والله من وراه بواحد من سيوفه
ويقعد يحاسب عند الموازين امام قاضي له مهابه وخوفه
ومن يأمن الدنيا علي الروح مسكين ياجي يوم غريبة اوصوفه
ليست هناك تعليقات:
إرسال تعليق